кексу волье - все уже обсосано до тя
на наших стар ф0румах - пока нашел
Автор: Jurkevich
Дата: 26-июн-05 05:09
Из превеликой (7 кг) старообрядческой книги под названием "Щит веры"
("напечатася с поморской рукописи первым тиснением в християнской
типографии при Преображенском богаделенном доме, в Москве, в лето
7421"), лл. 821 об. -- 825.
===========================================================
Первое: Кто жительствует во стране северней? Второе: Кто в
преполунощней стране скифския языки многочеловечнейшыя обретаются?
Третие: Что есть гог и магог, князя росска, мосох и фовель? Которым
повелевает пророк приуготовитися от многих лет, и в последняя лета
приити во многом собрании от места своего от конца северска на землю
израилеву, и тамо пораженным быти от божияго гнева, свыше огнем и
камением горящим одожденным, идеже будут мучими во веки веков. О сих
нужно есть вопросы таковы предложити:
О севере, или о полунощи.
Вопрос 1. Что есть полунощная страна, и киих и каковых жителей
содержит в себе?
Ответ. Повествовано есть в синопсисе киевском, яко прародителю
нашему афету осташася страны на запад и полунощь, в европе лежащыя,
в третией части жребия, в нейже славянороссы, или московския народы
жительство имеют, и прочая. Европия же содержит в себе преславны и
крепки государства, богатства и велие множество людей храбрых и
сильных и мудрых. сему бо афету дадеся достояние царское, храбрость
воинственна, и разширение племене его. афет бо толкуется разширение,
или разширителен. народ же афетов, прочих всех силою, мужеством и
храбростию превзыде, страшен и славен всему свету бысть (яко ветхии
и достовернии летописцы свидетельствуют). ни в чесом бо ином, но
точию в деле воинственном упражняшеся, и оттуду препитание и всякия
нужды своя исполняше. и от славных дел своих, наипаче же в воинском,
славянами, или славенами зватися начаша. сего ради, в память славы
народа славеньска, древнии российскии князие, сыном своим имена
припрязающе, к славе даяху: якоже святослав, или светослав, ярослав:
мстислав, сиречь мстяися о славе: мечислав, яко славен бе от меча, и
прочая сим подобная. Такожде и о народе сармацком (в той же европе,
третией части света, жребия афетова, идеже ныне седят татарове)
писано: Зане вся земля от сих людей трепеташе. Ниже: Откуду под тем
сарматцким именем все прародителе наши славенороссийстии, москва,
россы, поляки, литва, поморяне, волынцы и прочия заключаются.
О скифах.
Вопрос 2. Кто в преполунощней стране скифския языки, ихже андрей
святый гогом и магогом нарицает?
Ответ. Во алфавите толковом, в знамении В писано сице: Варвария
сирская во стране северней, еяже нарицахут скифиею внутреннею, иже
суть готфи и давники. В знамении Г: Готфи пошли от татар. А инде
пишет: Готфи пошли от немец. и живут готфы в стране северней, иже
нарицается скифия и варвария внутренняя сирская. В знамении С:
Скифия: казары, скифскии татарин. А грецы скифиею великою нарицают
руския грады: киев, чернигов, переяславль, полотецк, ростов и прочия
грады.
Такожде и в синопсисе, или летописце, киевском, о народе сарматском
писано сице: Сармацыи страна есть вся в той же европе, третией части
света, жребия афетова, обаче сугуба есть: едина скифская, идеже ныне
седят скифи, или татаре: вторая, идеже москва, русь, поляки, литва,
прусы и прочия обитают. Откуду под тем сармацким именем все
прародители наши славенороссийскии, москва, россы, поляки, литва,
поморяне, волынцы и прочия заключаются.
Но и в гранографе, во главе 10, такожде великою скифиею руския грады
повествователно нарицает, сице глаголя: Царство российское державы
исперва велицыи князи нарицахуся, многих великих градов: владимира и
пскова, мурома и ростова и иных многих градов. и бысть крещена от
великаго князя владимира киевскаго, и нарицашеся великая скифия.
О россах.
Вопрос 3. Что есть и кии, у иезекииля помяненныи, гог и магог князя
росска?
Ответ. Киевскии летописец, на листу 5-м, о народе руском изъявляет
сице: Российскии народы, тыяжде суть славяне: единаго бо естества,
отца своего афета, и тогожде языка. ибо яко славяне, от славных дел
своих, искони славеньское имя себе приобретоша: тако по времени, от
россеяния по многим странам племене своего, россеяны, и потом россы
прозвашася. Ниже: Недалече великаго нова града лежаще: иныя от реки
роси, друзии от русых власов, с яковыми и ныне везде суть руси.
Ниже: Тако все древнии летописцы: гречестии, росийскии, римскии,
польскии свидетельствуют. наипаче и божественное писание, от
пророчества иезекиилева, во главе 38 и 39-й, имя тое россов приличне
изъявляет, нарицающе князя роска мосох и прочая. И тако россы от
россеяния своего прозвашася, а от славянов именем точию разньствуют,
по роду же своему едино суть, и яко един тойжде народ славеньскии,
нарицается славенороскии, или славнороскии. Иныи же россы страною,
естеством же едины, в полунощных странах над езером илмером [в
оригинале с опечаткой: "иамером"] широко седоша: а прочии над
волховою рекою, идеже создаша нов град великии, и гостомысла
некоего, мужа нарочита, от среды себе в князя избраша. и по времени
град сей в толику славу и силу розрасте, яко некоим летописцем
немецким кранциусом в сицевую притчу ему внити: Кто же может или
дерзнет на бога и великии нов город? Егда же в велицем междоусобии и
многом нестроении российскии народы быша, не согласующеся во
избрании от среды себе властелина, советоваше. он же нарочит и
разумен муж, в великом новгороде живущь, гостомысл, да пошлют к
варягом и триех братии, иже бяху князи изящнейшии, и в храбрости
воинской изрядни, на княжение российское умолят. понеже варяги над
морем балтийским, еже от многих нарицается варяжское, селения своя
имуще, языка славеньска бяху, и зело мужественны и храбры.
О мосохе.
Вопрос 4. Кии мосох у иезекииля пророка воспоминается?
Ответ. Мосох, шестыи сын афетов, внук ноев, толкуется от еврейска
славеньски вытягающии и ростягающии: от вытягания лука, и от
разширения великих и мужественных народов московских,
славенороссийских, польских, волынских, ческих, болгарских,
сербских, карвацких, и всех обще, елико их есть славенска языка,
природне употребляющих. той бо мосох по потопе року 121. (Ниже): И
тако от мосоха, праотца славянороссийскаго, по наследию его, не
токмо москва, народ великии, но и вся русь, или россия, вышереченная
произыде. аще в некиих странах мало что в словесех и пременися,
обаче единым славеньским языком глаголют. И в повести известной, со
свидетельствы историков, писано сице: Рос же обретается в езекииле
пророце тако: князь рос мосох, фовель. И на се свидетельствуя,
сказует евсевий феодосион, и седмьдесять библии преложение, яко у
езекииля помяненныи мосох, московских знаменитыи предводитель.
О наречии москвы.
Вопрос 5. Царствующии град москва от чего зватися москвою нача?
Ответ. Наречие то москва, от имене праотца мосоха изшедшее, аще оно
искони вестно древним летописцем бе, обаче на мнозе и в молчании
пребываше. Начало же прия здания и звания от славнаго патриарха
нашего мосоха. москва бо град от мосоха праотца своего.
Москва бо город над рекою, от имене ея нареченныи, наипервей с древа
создан бысть: и не значен даже до великаго князя иоанна даниловича,
иже престол княжения от владимира града на москву град принесе. И
тако величеством славы престола княжения, от владимира града
пренесеннаго, богоспасаемый град москва прославися, и прародительное
в нем имя мосоха в народе российском обновися. еже неувядаемою
памятию в веки цветущи, изряднее же благодатию божиею от силы в
силу, и от славы в славу преспевая, на высочайшии ступень
самодержавнаго царствия востече. До зде синопсис и прочия истории.
Тако гог антихрист, магог же безчисленныя полки его быти показуются.
тако сим изыти от севера, или полунощныя страны доводствуется. тако
сии скифскими языками от андрея кесарийскаго нарицаются. тако и от
афанасия великаго антихристу оттуду изыти свидетельствуется. тако и
прочии учители толкуют от севера всем злым возгоретися. тако скифия
великая руские грады именуются. Сице у иезекииля пророка помяненныи
рос, роскии народ является (показуется). тако у того же иезекииля
помяненныи князь мосох, московскии знаменитыи предводитель
глаголется. Сице царствующии град москва по имени прародителя нашего
мосоха нарицается. Сия вкратце о гоге и магоге рехом, прочее не
дерзающе неизследимых судеб господних бездну испытовати скудоумием
нашим, псаломски вещающе: Яко возвеличишая дела твоя господи, зело
углубишася помышления твоя. муж безумен не познает, и неразумив не
разумеет сих. Псалом 91.
